1Cor 8 | KYG | STEP | Hemenimo aigofe goti'apimogimo afu ame'amo ali'a ofalinimo ne'apamiya kavafe'mo avo kaegesuve. Lapakaemo, Muki'amogitamo afi'none, hutapa nehaya gemo lama gemo nehae. Afite'a age'naya kava'mo'a ala vaya'mo mai'none, hu'a nehaya agufa himu'namu kava'mo alino afole aino ne'ateya'monanafa hapau apayamopafi'mo nehapaiya kava'mo'a alino lokiya vaino ne'apate.

1 Corinthians 8

Aigofe goti'apimogimo ne'apamiya ofalinimo ali'a ne'naya kavafe'mo hu'niya gemae

1 Hemenimo aigofe goti'apimogimo afu ame'amo ali'a ofalinimo ne'apamiya kavafe'mo avo kaegesuve. Lapakaemo, Muki'amogitamo afi'none, hutapa nehaya gemo lama gemo nehae. Afite'a age'naya kava'mo'a ala vaya'mo mai'none, hu'a nehaya agufa himu'namu kava'mo alino afole aino ne'ateya'monanafa hapau apayamopafi'mo nehapaiya kava'mo'a alino lokiya vaino ne'apate. 2 Afi'none, hu'a nehaya vaya'mogimo magoke alagepa gemo alagi o'afi'nae. 3 O'afi'naya'monanafa Gotife'mo hapau apayamopafi'mo nehapaiya vaya'mo apakeno aeto huteno'ae'mo vaya'nimo mai'nae, huno nehiye.

4 Nehiya'mofe'mo aigofe goti'apimogimo afu ame'amo ali'a ne'apamiya ofalinimo nesupi o'nesupi ani kavafe'mo avo kaegesuve. Aigofe goti'apimogimo ma mopafi ina agufa ya'mo hane'nigeno magoke Goti'a agai'age'mo mai'niyana mago alu gotigimo alagi o'mai'nae, huta ago afi'none. 5 Vaya'mogimo apaki ae'apae'mo, gotitimogitapae, hu'a apaki ne'aya goti'apimogimo ma mopafi mai'nisafi koku'napi'mo mai'nisafi hu'a mai'nisayana asole aigofe goti'apimogi maige asole aigofe ala kava vaya'apimo maige hu'a mai'nae. 6 Mai'naya'monanafa ago afiteta age'nonana magoke Goti'a afotimo'mo mai'niye. Agaemo muki ya'mo aepa vekamo mai'nigeta agaetefe'mo afa'a mai'none. Ani kava huno magoke Ala kava netimo mai'niye. Agaemo Yesu Kalaisi'a mai'nigeno Goti'a agaeteti'mo muki ya'amo alo hu male'niye. Lagaemo agaeteti'mo afa'a maisuna ya'mo aliteta mai'none.

7 Mai'nona'monanafa muki vaya'mogimo mani lama gemo alagi o'afi'nae. Mago vaya'mogimo yatala afina'mo aigofe goti'apimogife'mo mono hu'naya'mofe'mo hemenimo ofalini ne'apamiya ame'amo ali'a ne'ne'apae'mo, aigofe gotigimo apami'naya ofalinimo alita ne'netae'mo hosu kava'mo nehune, hu'a apakesamo afigae. Yu'ilaga veka'apimo'a alagepa huno o'afi'niya'mofe'mo ofalini ame'amo ali'a ne'ne'apae'mo yu'ilaga veka'apimo ali'a hosu hu'a ne'atae. 8 Ne'ataya'monanafa ne'ya'mo ne'nisupi o'ne'nisupigeno Goti'a ani kavatefe'mo amuse huno olategaiye. Ofalini afu ame'amo o'nesunana mago'e huta hosu kava'mo huta o'maigune. Ofalini ame'amo nesunana mago'e huta alagepa kava'mo huta o'maigune. 9 O'maiguna'mofe'mo alagepa hutapa kava yagaiyo. Hosu kavanagetapa kalavusifi'mo o'maitapa afa'a mai'netapae'mo negaune, hutapa nehaya kava'mo'a lokiya o'vai'naya vaya'mo apaiyafi'mo hapaesige'apae'mo hosu kavapi'mo asagau'a aigae. 10 Mago alagepa huno o'afi'nisiya vekamo'a lapakesiyana age'naya vaya'mogitapamo aigofe goti'apimogi mono nopi'mo mai'netapa ne'ya'mo ne'nesageno nelapakeno'ae'mo, aigofe goti'apimogi apami'naya ofalinimo afa'a negauve, huno agesamo afigiye. 11 Alagepa hutapa age'naya kavateti'mo alagepa huno o'afi'niya konagatimotefe'mo Kalaisi'a falino ate'niya konagatimo'mo neteno'ae'mo alagi lageso hugiye. 12 Lapakaemo konagatapimogi yu'ilaga veka'apimo alita hosu hutapa atetetapa apakaetegamo hosu kava'mo nehutapae'mo Kalaisitega'e'mo ani hosu kava'mo nehae. 13 Nehaya'mofe'mo afu ame'amo ne'novanageno konaga'nimo'mo hosu kava'mo hisige'nae'mo halate afu ame'amo alagi o'negauve. Hosu kavapi'mo asagauno o'aisiyafe'mo afu ame'amo o'negauve.